Këtë javë Asus prezantoi në një event online linjën e re të laptop-ëve Zenbook, një seri e cila fuqizohet nga proçesori i gjeneratës së fundit të Intel, ekrani fantastik OLED dhe çfarë është më e veçanta: këto produkte janë krijuar nga materiale miqësore ndaj mjedisit.
Çfarë e bën akoma më të veçantë këtë prezantim është spoti zyrtar i cili është xhiruar një muaj më parë në Shqipëri. Ai na njeh me tre personazhe të suksesshëm në fushat e tyre si: Kirshia Govender, biologe detare – Bartosz Wojczynski, astofotograf – Liz West, artiste e ngjyrave hapsinore. Secili prej artistëve gjen lehtësisht përshtatjen e përdorimit të linjës së re Asus Zenbook në punën e tyre të përditshme.
Geek Room pati mundësinë të ndiqte nga afër xhirimet e spotit të cilat u zhvilluan ne Tiranë dhe Durrës gjatë marsit dhe erdhën si një bashkëpunim midis kompanisë shqiptare të prodhimit Caravan dhe asaj gjermane Peoplegrapher. Një ekip prej më shumë se 80 personash u perfshinë në realizimin e spotit, regjia e të cilit mban emrin e James F. Coton.
Dita e parë
Përgatitjet e setit të xhirimeve nisën që në 5 të mëngjesit në një ambient i cili kishte improvizuar studion e Liz West. Shumë ngjyra, shumë rrëmujë dhe një Asus Zenbook për të përgatitur shfaqjen e ngjyrave në setin e dytë të ditës. Pasdite ndërrojme vendndodhje në një sallë e cila fton mbi 30 të rinj të shijojnë një spektakël ngjyrash të cilat komandohen direkt nga laptopi.
Dita e dytë
Zgjohemi sërisht herët për të shkuar në Portin e Durrësit. Xhirimet lidhen këtë herë me Kirshia Govender, e cila para zhytjes studion terrenin nënujor. Më pas ekipi largohet pak nga brigjet e qytetit për të xhiruar momentet e zhytjes së biologes (dhe polumbares profesioniste). Për të theksuar ndjesinë ndaj mjedisit, Asus kishte vendosur të drejtonte vëmendjen tek mbetjet detare aq të dëmshme për jetën e gjallesave. Pasditja na gjeti në brigjet e Kepit të Rodonit për të xhiruar momentet e daljes së Kirshia nga deti dhe sigurisht: përdorimin e Asus Zenbook.
Dita e tretë
Një ditë me shi dhe shumë mjegull në malin e Dajtit detyroi ekipin të përshtatej me kushtet dhe të ideonte një set fantastik brenda pak orësh. Bartosz Wojczynski erdhi në set me teleskopin e tij automatik i cili lidhej me laptopin dhe lëvizte automatikisht për të ndjekur një trup qiellor të caktuar. Nga lëvizjet me makinë në terrene të vështira, deri tek vendosja në një ambient të hapur midis shkëmbinjsh për të fotografuar qiellin – dita e tretë ishte më sfiduesja për ekipin.
Rezultati final?
Asus sapo ka publikuar spotin final të cilin Geek Room ju fton ta ndiqni më poshtë:
