Në një kohë kur gjithnjë e më shumë prodhues automjetesh po zgjedhin të ndalojnë mbështetjen për Apple CarPlay ka dhe kompani që nuk pajtohen me këtë kufizim. Pikërisht në këtë kontekst, Volvo po pozicionohet si një markë që vë zgjedhjen e klientit në qendër të strategjisë së saj teknologjike.
Në një intervistë për The Drive, Anders Bell, Chief Engineering and Technology Officer në Volvo, konfirmoi se kompania do të vazhdojë të ofrojë mbështetje për Apple CarPlay dhe Android Auto, përfshirë edhe në automjetet elektrike të ardhshme. Sipas Bell, kjo zgjedhje buron drejtpërdrejt nga filozofia bazë e Volvo-s: teknologjia duhet t’i përshtatet klientit dhe jetës së tij dixhitale, jo anasjelltas.
Komentet e Bell mbështesin deklaratat e mëparshme të Jorge Furuyas, Drejtuesit të Car UX në Volvo, i cili tha: “Nuk mund ta mohojmë atë që u pëlqen klientëve tanë dhe çfarë ua bën jetën më të mirë. Dhe ne e dimë se niveli i përdorimit të CarPlay në treg është masiv. Dhe për më tepër, ne e dimë se ekziston një nivel shumë i lartë përputhshmërie midis përdoruesve të Apple dhe klientëve të Volvo“.
Ndryshe nga disa prodhues që po përpiqen t’i shtyjnë përdoruesit drejt sistemeve operative dhe aplikacioneve plotësisht të kontrolluara prej tyre, Volvo beson se imponimi i një ekosistemi të vetëm nuk i shërben përvojës së përdoruesit. Bell thekson se klientët kanë ekosisteme të ndryshme digjitale dhe se detyra e kompanisë është t’i mbështesë këto zgjedhje, qoftë përmes Apple CarPlay, Android Auto apo sistemeve native të makinës.
Edhe pse Volvo po investon fuqishëm në zhvillimin e platformës së vet softuerike, mbështetja për CarPlay shihet si një element kyç për të ruajtur komoditetin, familjaritetin dhe vazhdimësinë e përvojës digjitale të përdoruesve.
Në një treg ku shumë kompani po heqin dorë nga kjo teknologji, qëndrimi i Volvo-s përforcon imazhin e saj si një prodhues që ka në fokus eksperiencën e përdoruesve.
