Shërbimet si Smart Summon dhe Park Assist do të çaktivizohen për një kohë të caktuar në disa makina.
Tesla ka lajmëruar se do të çaktivizojë sensorët ultrasonikë USS të cilat përdoren aktualisht në këto makina elektrike për të zbuluar pengesat në distanca të shkurtra. Ndërkohë që prodhuesit e tjerë përdorin LiDAR, një radar dhe sensorë të tjerë në bashkëpunim me kamerat, kompania e drejtuar nga Elon Musk është e vendosur të përdorë vetëm kamerat për të mbështetur sistemin asistues Tesla Vision.
Gjatë muajve në vijim sensorët ultrasonikë nuk do të funksionojnë në makinat Model Y dhe Model 3, dhe më pas nuk do të përfshihen në të njejtat modele që do të prodhohen në vitin 2023. Sipas Tesla, këto sensorë përdoren kryesisht për paralajmërimet në rast përplasjesh apo parkimi.
Këto ndryshime do të bëjnë që makinat e papajisura me USS do të jenë të limituar në përdorimin e disa shërbimeve si Park Assist, Autopark, Summon dhe Smart Summon. Këto shërbime më pas do të rikthehen përmes update-ve over-the-air në të ardhmen e afërme, sapo sistemi të performojë mirë në sistemin vetëm me kamera.
Vitin e kaluar Tesla çaktivizoi radarët në favor të përdorimit të Autopilot që bazohet vetëm në vizion. “Vizioni ka shumë më tepër preçizion.”
