Studiuesit e sigurisë kanë demonstruar një sulm të ri që realizohet nëpërmjet Bluetooth, i cili mund të hapë dyert e kyçura të një Tesla dhe të ndezë makinën.
Kjo cënueshmëri fshihet në Bluetooth Low Energy, teknologji e cila përdoret nga sistemi hyrës i Tesla që lejon drejtuesit të hapin dhe drejtojnë makinën e tyre nëpërmjet aplikacionit ose kartës nga distanca.
Shumica e pajisjeve dhe makinave me këtë teknologji janë dizenjuar për të qenë të mbrojtura ndaj sulmeve tipike që replikojnë sinjalet e kapura gjatë hapjes së dyerve. Mirëpo studiuesit në kompaninë britanike NCC Group tregojnë se kanë zhvilluar një mënyrë për të krijuar një lloj sulmi që i tejkalon kufizimet aktuale, duke mundësuar që persona të ndryshëm të marrin kontrollin e Tesla-s.
Sultan Qasim Khan, anëtar i NCC Group, tregoi në një postim në blog se kishte testuar sulmin në një Tesla Model 3 të vitit 2020 duke përdorur një version jo shumë të vjetër të aplikacionit Tesla. Përmes një iPhone 13 mini të vendosur 25 metra larg makinës, Khan aktivizoi sulmin dhe arriti të hapte dyert e makinës. I njejti test u krye dhe në një Tesla Model Y 2021 dhe rezultoi i suksesshëm.
Dhe pse sulmi u krye në makinat Tesla, Khan tregon se ky sulm mund të përdoret në të gjitha makinat që përdorin teknologjinë Bluetooth Low Energy për të hapur dyert.
