Mercedes-Benz ka këshilluar 292,000 pronarë të SUV të ndryshme të mos drejtojnë makinat e tyre deri sa të kenë kryer një kontroll sigurie në makinat e tyre.
Prodhuesi i makinave ka njoftuar se do të tërheqë nga tregu një model të përcaktuar ML, GL dhe R-Class të viteve 2006-2012 pasi ato mund të kenë një problem me frenat e tyre. Ky lajmërim konsiderohet nga Mercedes aq urgjent saqë i ofron pronarëve të këtyre makinave para ekstra për të përdorur një karrotrec për transportimin e makinës drejt një mekaniku, në mënyrë që drejtuesit të mos e përdorin atë.
Në një deklaratë të publikuar nga ekipi i kompanisë në SHBA u tregua se deri më tani nuk ka patur asnjë raportim aksidentesh, dëmtimesh apo vdekjesh të shkaktuara nga ky problem.
“Lagështia mund të grumbullohet nën një pjese gome të instaluar rreth përforcuesit të frenave. Me kalimin e kohës kjo gjë do të sjellë gërryerjen në këtë hapësirë, duke shkaktuar kështu një rënie të presionit në përforcuesin e frenave.” tregoi Mercedes.
Kompania shtoi dhe se në raste “tepër të rralla” ku gërryerja është e madhe, mundet që frenimi i fuqishëm të shkaktojë dëme mekanike si këputja e frenave. Pasojat e këtij problemi mund të jenë fatale.
Për këtë arsye Mercedes njofton të gjithë pronarët e mjeteve të prekura të mos e drejtojnë makinën e tyre deri në momentin që kontrollet të jenë kryer.
