Prodhuesi britanik i makinave sportive Lotus është përfshirë tashmë në tregun e makinave elektrike me SUV-in më të ri Eletre, i cili ka një dizajn të inspiruar nga modeli Evija. Eletre do të jetë makina e parë nga 3 makinat tërësisht elektrike që kompania planifikon të lançoj gjatë 4 viteve të ardhshme.
Kjo makinë vjen me elemente futuriste si përshembull prania e kamerave në vend të pasqyrave anësore dhe përdorimi i sensorëve LiDAR në pjesën e parme dhe të pasme të tavanit.
Si një prodhues i makinave sportive, Lotus nuk mund të mos i kushtonte rëndësi performancës së Eletre, dhe ka bërë të mundur që ky SUV me 600 kuajfuqi të arrijë 100km/h nga gjendja e qetësisë në më pak se 3 sekonda.
Është mjaft e mahnitshme se si ekipi krijues i ka dhënë një performancë të tillë makinës, ndërkohë që ajo ofron all-wheel drive dhe përfshin bateri me kapacitet mbi 100kWh. Lotus tregon se një karikues 350kW do të karikojë makinën për 400km në vetëm 20 minuta, ndërkohë që autonomia maksimale e kësaj makine do të jetë 600km.
Ndoshta ju do ta keni disi të vështirë për ta besuar, por Lotus Eletre është makina e parë e kompanisë e cila ka 5 dyer dhe që do të prodhohet në Kinë.
Eletre do të ndërtohet mbi platformën e re Electric Premium Architecture të kompanisë dhe do të përfshijë teknologjinë për drejtimin e pavarur të makinës.
