Kina është bërë vendi i parë në botë që ndalon zyrtarisht përdorimin e dorezave të fshehura në automjetet elektrike, një dizajn i bërë i famshëm nga Tesla e Elon Musk. Vendimi vjen në një kohë kur automjetet elektrike janë nën vëzhgim të shtuar nga autoritetet e sigurisë, pas disa incidenteve fatale, përfshirë dy aksidente vdekjeprurëse në Kinë me automjete elektrike Xiaomi, ku dyshohet se ndërprerja e energjisë pengoi hapjen e dyerve.
Sipas rregulloreve të reja të Ministrisë së Industrisë dhe Teknologjisë së Informacionit, automjetet do të lejohen të shiten vetëm nëse kanë mekanizëm mekanik për hapjen e dyerve, si nga brenda ashtu edhe nga jashtë. Këto rregulla do të hyjnë në fuqi më 1 janar 2027. Çdo derë pasagjeri, përveç bagazhit, duhet të ketë nga jashtë një hapësirë të futur me përmasa minimale 6 cm × 2 cm × 2.5 cm, për të mundësuar kapjen e dorezës. Brenda automjetit duhet të vendosen shenja të dukshme, që tregojnë qartë mënyrën e hapjes së derës, me përmasa minimale të përcaktuara.
Modelet e makinave që tashmë janë miratuar dhe janë në fazat përfundimtare të hyrjes në tregun kinez do të kenë një afat tranzitor prej dy vitesh për të përshtatur dizajnin e tyre. Dorezat e fshehura janë shumë të përhapura në tregun kinez të automjeteve, që përfshin automjetet elektrike, hibride dhe ato me qeliza karburanti. Ato përdoren në rreth 60% të 100 modeleve më të shitura NEV në Kinë.
Megjithëse rregullat vlejnë vetëm për tregun kinez, ndikimi pritet të jetë global, për shkak të rolit të madh të Kinës në industrinë botërore të automobilave. Ndërkohë, Tesla po hetohet edhe nga autoritetet amerikane dhe evropiane. Në SHBA, Administrata Kombëtare e Sigurisë së Trafikut (NHTSA) ka hapur një hetim për dorezat elektrike të Model Y, pas raportimeve se ato ndalonin së funksionuari, duke detyruar disa pronarë të thyenin xhamat për të nxjerrë pasagjerët, përfshirë fëmijë.
