Nëpërmjet raportimeve të fundit është mësuar se Apple ka punësuar ish-ekzekutivin e lartë të BMW, Ulrich Kranz, për të zhvilluar planet e saj për një makinë self-driving.
Kranz ka punuar për rreth 30 vite në BMW para se të themelonte kompaninë e tij të makinave self-driving Canoo. Para një muaji ai u largua nga pozicioni i CEO në kompaninë e tij për t’u bashkuar më pas me Apple.
Ky person është një ndër personat më të njohur të punësuar nga Apple për të zhvilluar iniciativën në tregun automobilistik. Kranz do t’i raportojë Doug Field, i cili drejtoi zhvillimin e Tesla Model 3 para se të përfshihej në “Project Titan” të Apple.
Project Titan u hartua fillimisht në 2014, dhe që nga ajo kohë është përballur me një numër të madh pengesash. Në 2016, Apple i ndaloi këto plane për t’u përqëndruar më tepër në krijimin e sistemeve autonome e cila mund t’I shitej prodhuesve të tjerë të makinave.
Në fillim të vitit 2021 u përfol se Apple ishte në diskutime me Hyundai dhe KIA për të prodhuar “Apple Car”. Megjithatë është e sigurtë të themi se nuk do të shohim një Apple Car brenda këtyre 5 ose 6 viteve.
