YouTube po prezanton një përvojë të re përmbledhëse vjetore, të quajtur Recap, që u lejon përdoruesve të shohin në mënyrë të përmbledhur zakonet e tyre më domethënëse të shikimit gjatë vitit. Sipas kompanisë, Recap “nxjerr në pah interesat, zhytjet e thella dhe momentet” duke u bazuar në historikun e shikimit të përdoruesit. Përvoja vizuale vjen përmes deri në 12 kartave që evidentojnë kanalet kryesore, temat dominuese dhe mënyrën se si janë ndryshuar preferencat me kalimin e kohës.
Koncepti i Recap është shumë i ngjashëm me Wrapped e Spotify, si dhe me përmbledhje të ngjashme nga Apple Music apo Amazon Music. Ashtu si Wrapped, edhe YouTube Recap u jep përdoruesve një tip “personaliteti” bazuar në sjelljet e shikimit, si p.sh. Adventurer, Skill Builder apo Creative Spirit, një mënyrë argëtuese për të personalizuar përvojën.
Funksioni është duke u prezantuar fillimisht në SHBA duke nisur nga sot dhe do të shpërndahet globalisht gjatë javës. Ai është i disponueshëm si në celular ashtu edhe në desktop, dhe mund të gjendet nga butoni i dedikuar në faqen kryesore të YouTube ose te seksioni “You” në menunë e përdoruesit.
Recap përfshin edhe statistika të dëgjimit të muzikës, si artistët dhe këngët kryesore, por nuk zëvendëson Recap e YouTube Music, i cili mbetet i pavarur dhe vazhdon t’u ofrojë përdoruesve një analizë të detajuar të artistëve, këngëve, zhanreve dhe podcasteve më të dëgjuara.
Së bashku me funksionin e ri, YouTube publikoi edhe disa tabela me trendet më të përhapura në SHBA për këtë vit nga temat, te krijuesit, podcastet dhe këngët më të shikuara. Disa statistika ishin të pritshme, si dominimi i MrBeast në listën e krijuesve apo pozicionimi i “The Joe Rogan Experience” si podcast-i më i ndjekur. Megjithatë, një detaj interesant është se soundtrack-u i KPop Demon Hunters pati performancë shumë më të dobët në Shorts sesa në renditjen e këngëve më të njohura në platformë.
