YouTube ka prezantuar zyrtarisht një shërbim të ri për zbulimin e përmbajtjeve së krijuar nga inteligjenca artificiale, e cila u mundëson krijuesve të identifikojnë dhe raportojnë videot që përdorin pamjen ose zërin e tyre pa autorizim. Funksioni është pjesë e YouTube Partner Program dhe aktualisht po shpërndahet për një grup të kufizuar krijuesish, me planin që të zgjerohet gradualisht gjatë muajve të ardhshëm.
Pasi krijuesit verifikojnë identitetin e tyre, ata mund të hyjnë në seksionin Content Detection në YouTube Studio, ku mund të shohin videot e identifikuara automatikisht si të dyshimta. Nëse një video rezulton të përdorë fytyrën ose zërin e tyre në mënyrë të paautorizuar përmes AI, ata mund të paraqesin kërkesë për heqjen e saj. YouTube paralajmëroi se sistemi është ende në zhvillim dhe mund të shfaqë edhe klipet origjinale të vetë krijuesve, duke funksionuar në mënyrë të ngjashme me Content ID, që përdoret për të zbuluar materiale të mbrojtura nga të drejtat e autorit.
Shërbimi u njoftua fillimisht vitin e kaluar dhe u testua në dhjetor përmes një programi pilot me talente të përfaqësuara nga agjencia Creative Artists Agency (CAA). Qëllimi është që figurat publike dhe krijuesit me ndikim të kenë mjete për të kontrolluar përdorimin e identitetit të tyre digjital në përmbajtje të gjeneruar nga AI.
Ky zhvillim është pjesë e një përpjekjeje më të gjerë nga YouTube dhe Google për të përballuar sfidat që sjell përhapja e përmbajtjeve sintetike. Platforma tashmë kërkon etiketimin e videove të modifikuara me AI dhe ka prezantuar rregulla të rrepta për muzikën e krijuar nga AI, veçanërisht për rastet kur imitohet zëri unik i një artisti. Me këtë hap, YouTube synon të ruajë besueshmërinë e përmbajtjes dhe të mbrojë krijuesit nga abuzimet digjitale.
