Para pak muajsh raportuam një lajm tepër të mirë për të gjithë qytetarët e Tiranës: oraret zyrtare të lëvizjes së urbaneve në këtë qytet ishin integruar në aplikacionin Google Maps, duke e bërë më të thjeshtë lëvizjen e qytetarëve nëpërmjet transportit publik.
Tashmë kemi një lajm të mirë për të gjithë qytetarët e Shqipërisë: në Google Maps janë integruar tashmë dhe oraret e linjave të autobusëve ndërqytetës. Në këtë mënyrë ju mund të përllogarisni më mirë kohën e nisjes së autobusit nga qyteti juaj dhe arritjes në një qytet tjetër për të humbur sa më pak kohë në kryerjen e punëve.
Nëpërmjet një postimi në rrjetet sociale, Ambasada Gjermane Tiranë ka njoftuar risinë e ardhur në Google Maps.
Në të shkruhet: ”Falë përpjekjeve të Drejtoria e Përgjithshme e Shërbimeve të Transportit Rrugor dhe mbështetjes së GIZ Albania informacioni i transportit publik në të gjithë Shqipërinë është tashmë në përputhje me GTFS, një standard global i të dhënave. Faleminderit të gjithë partnerëve dhe kontribuesve që bënë të mundur këtë arritje të rëndësishme. Së bashku, ne po përmirësojmë shërbimet publike dhe po ecim drejt një të ardhmeje më të lidhur dhe të qëndrueshme në Shqipëri!“
Hapni dhe ju Google Maps tani për të testuar këtë shërbim të ri mjaft të rëndësishëm!
