WhatsApp më në fund ka filluar të sjellë mbështetje për telefonata audio dhe video edhe në versionin Web, duke mbyllur një problematikë të vjetër në platformë. Që në prill të vitit të kaluar ishte raportuar se kompania po punonte për këtë funksionalitet, dhe tani, pothuajse një vit më vonë, veçoria po bëhet e disponueshme për disa përdorues.
Deri tani, thirrjet audio dhe video kanë qenë të mbështetura në aplikacionet e WhatsApp për Windows dhe Mac që nga viti 2021. Ndërkohë, WhatsApp Web, i cili u lançua që në vitin 2015, kishte mbetur prapa dhe konsiderohej si një version më i kufizuar, shpesh i etiketuar si “lite”. Me përditësimin e ri, kjo diferencë po zhduket.
Sipas WABetaInfo, WhatsApp ka nisur shpërndarjen graduale të thirrjeve native direkt në WhatsApp Web. Aktualisht, funksionaliteti u mundëson disa përdoruesve të kryejnë telefonata normale, ndërsa pritet që telefonatat në grup të shtohen në një fazë të mëvonshme. Përvoja e përdorimit është shumë e ngjashme me atë në aplikacionet desktop: përdoruesi hap një bisedë, klikon ikonën e thirrjes në cepin e sipërm djathtas dhe zgjedh nëse dëshiron thirrje zanore apo video.
Një element i rëndësishëm është siguria. Thirrjet e realizuara përmes WhatsApp Web ruajnë të njëjtin nivel mbrojtjeje si në platformat e tjera, duke qenë plotësisht të enkriptuara nga skaji në skaj përmes protokollit Signal. Kjo garanton privatësinë e komunikimit, pavarësisht se përdoruesi ndodhet në shfletues.
Përveç kësaj, përditësimi sjell edhe funksionin Screen Share gjatë thirrjeve video, i cili funksionon njësoj si në aplikacionet për Windows dhe Mac. Aktualisht, telefonatat në WhatsApp Web janë të disponueshme vetëm për përdoruesit e programit beta, por pritet që në javët në vijim të shtrihen edhe tek përdoruesit e versionit stabil.
