Ne kemi shumë mënyra për të komunikuar me njëri-tjetrin në ditët e sotme: thjesht mund t’i dërgoni një mesazh dikujt, t’i dërgojmë një mesazh zanor ose të shkruani një email nëse është një bisedë më formale. Sigurisht ju mund t’i telefononi edhe njerëzit, gjë që po përdoret gjithnjë e më pak nga të rinjtë.
Tashmë WhatsApp do të shtojë një mundësi të re komunikimi në platformë, atë të dërgimit të videoklipeve të shkurtra, spontane dhe të papërpunuara. Snapchat ishte i pari që e prezantoi këtë mënyrë të komunikimit, megjithatë Meta si gjithmonë i ka marrë shërbimet inovatore dhe i ka përshtatur në platformat e saja.
Një gjë e tillë u vu re nga WABetaInfo në një përditësim beta të aplikacionit. Funksioni i ri u zbulua në të dy versionet Android dhe iOS të aplikacionit dhe tashmë është i aksesueshëm për disa testues beta. Sigurisht, përdoruesit e WhatsApp e kanë patur mundësinë të dërgonin video të regjistruara në chat, ose duke zgjedhur një nga galeria e tyre ose duke e regjistruar një në vend dhe duke klikuar butonin dërgo. Veçoria e video-mesazheve, nga ana tjetër, do të funksionojë më shumë si mesazhet zanore.
Ju duhet të mbani shtypur butonin e regjistrimit (momentalisht për mesazhet zanore), dhe më pas video e regjistruar do të dërgohet automatikisht kur ju të largoni gishtin nga ky buton. Ju gjithashtu duhet të jeni në gjendje të rrëshqitni majtas për ta fshirë.
Butoni i ri i video-mesazheve do të jetë aty ku është ai i mesazheve zanore dhe përdoruesit duhet të shtypin një herë mbi të për të kaluar midis dy mënyrave.
