Aplikacioni i komunikimit WhatsApp është bllokuar plotësisht në Rusi për mosrespektim të ligjeve lokale, njoftoi Kremlini. Zëdhënësi i Kremlinit, Dmitry Peskov, deklaroi se vendimi ishte zbatuar për shkak të refuzimit të Meta-s për t’iu bindur kërkesave ligjore ruse dhe u sugjeroi qytetarëve të përdorin aplikacionin shtetëror MAX, i cilësuar si “alternativë kombëtare”.
Sipas autoriteteve ruse, MAX është një platformë në zhvillim që synon të zëvendësojë shërbimet e huaja. Megjithatë, kritikët e përshkruajnë MAX si një mjet survejimi, akuza që qeveria ruse i mohon, duke theksuar se aplikacioni integron shërbime shtetërore për të lehtësuar jetën e përditshme të qytetarëve.
Bllokimi i WhatsApp, aplikacionit më të përdorur të komunikimit në Rusi, vjen pas 6 muajsh presioni ndaj kompanisë amerikane dhe reflekton një strategji më të gjerë për krijimin e një infrastrukture komunikimi “sovrane”, ku platformat e huaja duhet t’u nënshtrohen ligjeve vendase ose të largohen. Meta ishte shpallur më herët organizatë ekstremiste në Rusi, ndërsa WhatsApp kishte paralajmëruar se po përballej me përpjekje për izolim të plotë të shërbimit të tij, duke rrezikuar komunikimin privat dhe të sigurt për mbi 100 milionë përdorues.
Teknikisht, disa domene të WhatsApp u hoqën nga regjistri kombëtar i domeneve, duke e bërë aplikacionin të aksesueshëm vetëm përmes VPN.
Reagimet në Moskë ishin të përziera: disa qytetarë shprehën shqetësim për kufizimin e lirisë së zgjedhjes, ndërsa të tjerë u shprehën indiferentë ose deklaruan se do të përdorin VPN për aq kohë sa të jetë e mundur. Ndërkohë, autoritetet vazhdojnë të promovojnë MAX, në një kontekst ku edhe platforma të tjera si Facebook, Instagram, Snapchat dhe YouTube janë të bllokuara ose të kufizuara.
