Reddit e din se të dhënat që gjenden në platformë janë tepër të rëndësishme për inteligjecën artificiale, prandaj ka lajmëruar se do të ndryshojë aksesin që kompanitë e AI kanë mbi Reddit.
“Ne po prezantojmë një akses të ri premium për palët e 3-ta që janë të interesuara për shërbime shtesë si dhe të drejta përdorimi pa limit.” shkruan Reddit në një postim në blog. Një zëdhënës i kompanisë tregoi se ndërkohë që Reddit po zgjerohet globalisht, po punon për të krijuar një ekosistem më të qëndrueshëm dhe më të shëndetshëm rreth të dhënave të ruajtura.
Tashmë kompania është në hapat e fundit të finalizimit të proçesit që do të detyrojë kompanitë të paguajnë për akses në API (në mënyrën që dy programe software komunikojnë me njëri-tjetrin).
“Grupi i të dhënave në Reddit është tepër i çmuar,” tregon bashkëthemeluesi dhe CEO i Reddit, Steve Huffman. “Megjithatë ne nuk kemi pse t’i ofrojmë këto informacione kompanive më të mëdha në botë falas.”
Microsoft, OpenAI dhe Google, të cilat kanë zhvilluar modele AI, kanë përdorur aksesin në API të Reddit për të trajnuar modelet e gjuhëve të tyre pa paguar asnjë shifër të caktuar. Duket se tashmë Huffman nuk do ta lejojë një gjë të tillë.
Kompania lajmëroi se “API do të jetë i aksesueshëm për t’u përdorur falas në raste më të përshtatshme,” ku zhvilluesit e aplikacioneve mund të krijojnë aplikacione të reja për të ndihmuar të gjithë përdoruesit e Reddit.
