Dhe pse kishin kaluar vetëm disa orë nga prezantimi i My AI Chatbot në Snapchat, Lyndsi Lee (një mama nga Missouri) i kërkoi vajzës së saj 13 vjeçare që të mos e përdorë këtë shërbim.
“Kjo është një zgjidhje e përkohshme deri sa unë të mësoj më tepër rreth AI dhe të vendos disa kufinj të shëndetshëm për përdorimin e tij.” tha Lee, e cila punon në një kompani software-sh. Ajo i trembet faktit se si AI mund t’i prezantohet përdoruesve të rinj si vajza e saj në Snapchat.
Ky shërbim është i fuqizuar nga chatbot-i më i famshëm i momentit, ChatGPT, dhe njësoj si ky chatbot, ai mund të ofrojë rekomandime, t’i përgjigjet pyetjeve si dhe të bisedojë me përdoruesit. Mirëpo versioni i Snapchat ka disa veçori të tjera: ai mund të personalizohet nga përdoruesit me një emër të ri, të përfaqësohet nga një Bitmoji sipas dëshirës së përdoruesve si dhe të aktivizohet gjatë bisedave me miqtë.
Prandaj kur komunikoni me chatbot-in e Snapchat nuk duket sikur po bisedoni me një kompjuter, por me një person tjetër.
Që nga ditët e lançimit të këtij shërbimi ka patur disa probleme, ku një përdorues tregoi se chatbot-i e mashtroi duke i thënë se nuk e dinte se ku ky person ndodhej. Pasi përdoruesi e lehtësoi disi bisedën, chatbot-i i tregoi se jetonte në Colorado.
Nga ana tjetër, një psikologe në NYC tha se prindërit e disa pacientëve janë të shqetësuar rreth mënyrës se si fëmijët e tyre adoleshentë ndërveprojnë me këtë shërbim të Snapchat. Ata shqetësohen më tepër rreth këshillave që jepen mbi shëndetin mendor pasi mjetet AI mund të bisedojnë me përdoruesit rreth problemeve të tilla, në vend që t’i drejtojnë në një psikolog.
