Në Shqipëri gjatë kohëve të fundit ka patur një numër në rritje të raportimeve nga qytetarët për skemat mashtruese të përdorura nga numra të panjohur në platformën e mirënjohur WhatsApp.
Qëllimi i këtyre mesazheve është t’ju bëjë të besoni se ka një problem me llogarinë tuaj të Facebook, dhe se aktiviteti juaj në këtë platformë do të kufizohet në rast se ju nuk “verifikoni të dhënat” në linkun e bashkëngjitur me mesazhin. Për ta bërë këtë mesazh sa më të besueshëm, në fund mund të shikoni dhe emrin e kompanisë mëmë të WhatsApp, Meta Platforms Inc.
Megjithatë ju nuk duhet të bini pre e këtij mashtrimi! Ja se si duhet të veproni për të mbrojtur të dhënat tuaja nga mashtruesit.
- Mos hapni links të dyshimtë që ju vijnë nga numra të panjohur
- Lexoni me kujdes mesazhet, ato që vijnë zakonisht nga mashtruesit kanë gabime gramatikore ose nuk kanë kuptim në gjuhën shqipe pasi janë të përkthyera nga shërbime në internet
- Bllokoni në platformat e caktuara këta persona mashtrues
- Raportoni numrin në mënyrë që platforma të marrë masa kundrejt mashtruesve
Sektori për Hetimin e Krimeve Kibernetike në Drejtorinë e Policisë së Qytetit Tiranë ka bërë të ditur se është në dijeni të kësaj skeme mashtrimi dhe i bën thirrje të gjithë qytetarëve për kujdes të shtuar, sidomos nga numrat e huaj të panjohur, në mënyrë që të mbroni të dhënat tuaja. Në rast dyshimesh ose shqetësimesh lidhur me këto mesazhe, përdoruesit janë të ftuar të paraqiten pranë zyrave të policisë për asistencë dhe ndihmë.
