Pas një dekade ngritjeje eksplozive, kompania e njohur më parë si Facebook po planifikon të ulë shpenzimet pasi po përballet me një periudhë jo të mirë. Bloomberg raporton se CEO i Meta, Mark Zuckerberg ka lajmëruar se nuk do të punësohen më punonjës të rinj në kompani deri në një lajmërim të dytë dhe se do të ristrukturojë disa grupe punonjësish në një takim të brendshëm.
Sipas Bloomberg, Meta ka në plan të zvogëlojë buxhetet brenda kompanisë, duke përfshirë këtu dhe ekipet në të cilët po investonte. Meta ka investuar shumë në VR duke krijuar metaverse-in e saj gjatë muajve të fundit, por është përballur dhe me probleme në menaxhimin e produkteve të tjera kryesore si Instagram, ku nuk po gjejnë dot formulën e duhur për të tërhequr përdoruesit e TikTok drejt Reels.
Për momentin Meta është e vetmja kompani teknologjike e madhe e cila po planifikon të zvogëlohet në staf dhe buxhet, gjë që tregon se kompaninë e pret një kohë e vështirë. Dhe situata e keqe ekonomike në të gjithë botën nuk e ka lehtësuar këtë gjendje. Një tjetër problem madhor vjen nga Apple e cila bëri disa ndryshime kryesore mbi privatësinë e përdoruesve të iPhone.
Zuckerberg e bëri këtë gjë të ditur që në korrik të këtij viti gjatë një mbledhje të brendshme ku tregoi se kompania po i afrohet “një rënie ndër më të këqijat në histori”.
