Kanadaja të hënën ndaloi përdorimin e aplikacionit kinez të mesazheve WeChat dhe programin rus antivirus Kaspersky në pajisjet elektronike të përdorura nga qeveria për shkak të rreziqeve të privatësisë dhe sigurisë, por tha se informacioni i qeverisë nuk ishte komprometuar.
Ndalimi u njoftua pas një vlerësimi nga shefi i informacionit të Kanadasë se WeChat në pronësi të Tencent dhe aplikacionet e krijuara nga Kaspersky me bazë në Moskë “paraqesin një nivel të papranueshëm rreziku për privatësinë dhe sigurinë“, tha Bordi i Thesarit të Kanadasë, i cili mbikëqyr administratën publike.
Kaspersky tha se ishte i befasuar dhe i zhgënjyer dhe se vendimi u mor pa paralajmërim ose pa një mundësi që firma të adresonte shqetësimet e qeverisë. “Meqë nuk ka pasur prova apo proces të rregullt për të justifikuar ndryshe këto veprime, ato janë shumë të pambështetura dhe një përgjigje ndaj klimës gjeopolitike dhe jo një vlerësim gjithëpërfshirës i integritetit të produkteve dhe shërbimeve të Kaspersky”, tha kompania në një deklaratë.
WeChat nuk iu përgjigj menjëherë një kërkese për koment. Bordi i Thesarit tha se nuk ka prova që informacioni i qeverisë është komprometuar, por metodat e grumbullimit të informacioneve nga aplikacionet ofrojnë akses të konsiderueshëm në përmbajtjen e një pajisjeje dhe rreziqet e përdorimit të tyre ishin “të qarta“.
“Vendimi për të hequr dhe bllokuar aplikacionet WeChat dhe Kaspersky u mor për të siguruar që rrjetet dhe të dhënat e qeverisë së Kanadasë mbeten të sigurta dhe të mbrojtura dhe janë në përputhje me qasjen e partnerëve tanë ndërkombëtarë”, thuhet në deklaratë. Aplikacionet do të hiqen nga pajisjet celulare të lëshuara nga qeveria të hënën dhe përdoruesit do të bllokohen nga shkarkimi i tyre në të ardhmen. Kanadaja në shkurt ndaloi TikTok, në pronësi të kompanisë kineze Bytedance, në pajisjet e qeverisë për shkak të shqetësimeve të ngjashme të privatësisë dhe sigurisë.
