Franca, Spanja dhe Greqia po kërkojnë vendosjen e verifikimit të detyrueshëm të moshës në platformat e mediave sociale si Facebook dhe X, sipas një raportimi të Bloomberg. Sipas rregullave të propozuara, të gjitha pajisjet që lidhen me internetin duhet të pajisen me teknologji për verifikimin e moshës. Këto tri vende të BE-së po bashkërendojnë nismën përpara një takimi më 6 qershor me përfaqësues të tjerë të BE-së.
Ato argumentojnë se mungesa e mekanizmave efektivë dhe të përhapur për verifikimin e moshës e bën të vështirë zbatimin e kufizimeve për të miturit. Sipas tyre, fuqia e madhe ekonomike e BE-së, me 450 milionë konsumatorë, duhet të përdoret për të detyruar kompanitë teknologjike të zbatojnë sisteme të forta verifikimi.
Presidenti francez Emmanuel Macron ka shprehur mbështetjen për këtë nismë, duke theksuar ndikimin negativ të rrjeteve sociale në shëndetin mendor të të rinjve dhe nevojën për t’i mbrojtur ata. Edhe kryeministri spanjoll Pedro Sánchez ka kërkuar një identifikim të vërtetë për çdo përdorues të rrjeteve sociale, si mënyra e vetme për të garantuar që të miturit nuk ekspozohen ndaj përmbajtjeve të papërshtatshme.
Komisioni Evropian dhe disa shtete anëtare janë duke zhvilluar projekte pilot për përmirësimin e kontrollit prindëror dhe verifikimit të moshës, por përballen me vështirësi për shkak të ndryshimeve ligjore mes vendeve dhe aksesit të lehtë nga jashtë BE-së.
Ndërkohë, Australia ka ndaluar qasjen në rrjete sociale për personat nën 16 vjeç, ndërsa Spanja dhe Norvegjia kanë nisma të ngjashme në proces. Në Francë, 200 shkolla po testojnë një “pushim digjital” që ndalon përdorimin e telefonave gjatë orarit mësimor për nxënësit nën 15 vjeç. Kufizime të ngjashme janë vendosur edhe në Rusi.
