Google ka njoftuar se gjatë vitit 2025, falë përdorimit të inteligjencës artificiale, ka bllokuar 1.75 milion aplikacione që shkelën politikat e saj në Google Play. Ky numër është dukshëm më i ulët krahasuar me 2.36 milion aplikacione të bllokuara në vitin 2024. Sipas kompanisë, rënia tregon se sistemet e reja të mbrojtjes të fuqizuara nga AI po i dekurajojnë aktorët keqdashës që të tentojnë edhe publikimin e aplikacioneve të dëmshme.
Google shpjegon se çdo aplikacion i ri i nënshtrohet mbi 10,000 kontrolleve të sigurisë dhe se verifikimet vazhdojnë edhe pas publikimit. Modelet më të fundit të AI gjenerative ndihmojnë vlerësuesit njerëzorë të zbulojnë më shpejt modele keqdashëse. Gjithashtu, kompania bllokoi 160 milion vlerësime spam, duke parandaluar rënien mesatare prej 0.5 yjesh të aplikacioneve që ishin objekt i “review bombing”. Në vitin 2025, 255,000 aplikacione u kufizuan në aksesimin e tepruar në të dhëna sensitive të përdoruesve, një rënie e fortë nga 1.3 milion një vit më parë.
Në të njëjtën kohë, sistemi mbrojtës i Android-it, Google Play Protect, identifikoi mbi 27 milion aplikacione të reja keqdashëse, duke paralajmëruar përdoruesit ose duke penguar ekzekutimin e tyre. Mbrojtja e përmirësuar kundër mashtrimeve tani mbulon 2.8 miliardë pajisje Android në 185 tregje dhe ka bllokuar 266 milion tentativa të rrezikshme instalimi përmes “side-loading”.
Google thekson se iniciativa si verifikimi i zhvilluesve, kontrollet e detyrueshme para publikimit dhe kërkesat për testim kanë rritur ndjeshëm standardet e sigurisë në ekosistemin e Google Play. Megjithatë, kompania vazhdon të përballet me presion nga rregullatorët, veçanërisht në Bashkimi Evropian, të cilët e akuzojnë për praktika monopolistike dhe mosrespektim të plotë të rregullave të Aktit për Tregjet Digjitale (Digital Markets Act), pavarësisht ndryshimeve të bëra në strukturën e tarifave për zhvilluesit.
