Elon Musk njoftoi të premten përmes një postimi në rrjetin social X se së shpejti do të heqë dorë nga përdorimi i një numri celular, dhe për të komunikuar do të përdorë shërbimet e ofruara nga vetë X, si përshembull telefonatat zanore dhe ato me video.
“Brenda disa muajsh, unë do të ndaloj së përdoruri numrin tim celular dhe do të përdor vetëm X për komunikim përmes mesazheve apo telefonatat zanore/video.” lexohet në postimin e bërë nga Musk.
Lëvizja e Musk shihet si një përpjekje për të promovuar veçoritë e thirrjeve audio/video të X, të cilat u prezantuan në tetor të vitit të kaluar. Që atëherë ai ka shprehur hapur dëshirën që X të evoluojë në një “aplikacionin e gjithçkasë“. X lançoi një version të hershëm të thirrjeve video dhe audio për disa përdorues vitin e kaluar. Megjithatë, thirrja në X nuk duket të jetë e enkriptuar, si në shërbimet e tjera të ngjashme si WhatsApp ose FaceTime e Apple.
Sipas faqes së internetit të X, të gjitha llogaritë mund të marrin telefonata, por vetëm personat e abonuar në shërbimin premium mund të bëjnë thirrje audio dhe video. Platforma e mediave sociale ofron privatësi të përmirësuar të thirrjeve, një cilësim i ri në X, që ndihmon në mbrojtjen e privatësisë së përdoruesit, sipas faqes së internetit. Me këtë shërbim të aktivizuar, adresa IP do të fshihet nga njerëzit që telefonon dhe do të marrë telefonata.