Carl Pei, bashkëthemelues dhe CEO i Nothing, po imagjinon një të ardhme përtej smartphone-ve tradicionalë, ku pajisjet nuk do të funksionojnë në bazë të aplikacioneve, por duke u bazuar në agjentët inteligjentë të fuqizuar nga AI. Sipas tij, aplikacionet siç i njohim sot janë të destinuara të zhduken, pasi vlera kryesore do të zhvendoset nga ndërfaqet për njerëzit te sistemet që veprojnë drejtpërdrejt në vend të përdoruesit.
Gjatë një interviste në konferencën SXSW në Austin, Pei theksoi se startup-et që ndërtojnë vlerën e tyre rreth një aplikacioni do të përballen me vështirësi të pashmangshme. Vizionin për një pajisje “AI-first” ai e ka artikuluar edhe më parë, duke qenë një nga arsyet pse kompania siguroi 200 milionë dollarë financim në raundin e tretë. Ideja kryesore është krijimi i një pajisjeje që përdor inteligjencë artificiale dhe personalizim aq të saktë, sa përdoruesit të mos kenë nevojë të verifikojnë vazhdimisht rezultatet e saj.
Pei shpjegoi se hapi i pare, ku AI ekzekuton komanda të thjeshta si rezervime fluturimesh apo hotelesh po testohet tashmë, por ai e konsideron këtë fazë “të mërzitshme”. E ardhmja, sipas tij, fillon kur AI mëson qëllimet afatgjata të përdoruesit dhe ofron sugjerime proaktive, për shembull për një stil jete më të shëndetshëm, pa pasur nevojë për kërkesa të drejtpërdrejta.
Ai kritikoi mënyrën aktuale të përdorimit të smartphone-ve, e cila sipas tij ka mbetur pothuajse e pandryshuar prej dy dekadash: ekrane kryesore, aplikacione, dyqane aplikacionesh. Ndërkohë, teknologjia ka avancuar ndjeshëm, por përdoruesit ende duhet të kalojnë nëpër shumë hapa dhe aplikacione për të realizuar edhe qëllime të thjeshta, si organizimi i një takimi për kafe.
Vizioni i Pei është një pajisje që “të njeh shumë mirë” dhe, sapo kupton qëllimin tënd, e realizon atë automatikisht përmes AI. Kjo nënkupton edhe një ndërfaqe të re, të projektuar jo për njerëzit, por për vetë agjentin inteligjent. Një qasje që, sipas tij, është më e qëndrueshme dhe përfaqëson të ardhmen e vërtetë të pajisjeve inteligjente.
