Apple po teston një shërbim të ri për Siri që do të ekzekutojnë disa kërkesa brenda një komande të vetme. Ky shërbim pritet të vijë me përditësimet e ardhshme të sistemeve operative, përfshirë iOS 27, iPadOS 27dhe macOS 27. Aktualisht, Siri kërkon që çdo detyrë të jepet veçmas, gjë që e ka lënë pas krahasuar me asistentët modernë të inteligjencës artificiale.
Funksioni i ri do të mundësojë kombinimin e veprimeve si kontrolli i motit, krijimi i një takimi në kalendar dhe dërgimi i një mesazhi në një kërkesë të vetme. Ky zhvillim është pjesë e një përpjekjeje më të gjerë për të modernizuar Siri-n, duke e bërë atë më të aftë të kuptojë kontekstin, përfshirë të dhënat personale të përdoruesit dhe përmbajtjen në ekran.
Apple planifikon të prezantojë këto përmirësime në Worldwide Developers Conference më 8 qershor. Edhe pse një version më i avancuar i Siri u demonstrua që në vitin 2024, prezantimk është shtyrë disa herë për shkak të sfidave teknike, por tani pritet të dalë në vjeshtë.
Ndryshimet përfshijnë edhe një qasje më të ngjashme me chatbot-et dhe një aplikacion të pavarur për Siri-n. Gjithashtu, Apple po zhvillon një funksion të quajtur “World Knowledge Answers”, që do t’i lejojë asistentit të kërkojë dhe përmbledhë informacion nga interneti. Kjo do ta bëjë Siri më konkurruese ndaj platformave si ChatGPT dhe Google Gemini.
Përveç kësaj, kompania po teston një tastierë të re me autocorrect më të avancuar, e ngjashme me Grammarly, si dhe përmirësime në integrimin me aplikacione të palëve të treta përmes App Store. Disa nga këto funksione mund të publikohen si “Preview”, duke treguar se janë ende në zhvillim.
