Apple ka vendosur të tërheqë nga App Store një kategori aplikacionesh të gjenerimit të imazheve përmes AI që “reklamojnë aftësinë për të krijuar imazhe nudo jo konsensuale”.
Sipas një raporti të ri nga 404 Media, Apple ka hequr disa aplikacione të AI nga App Store që pretendonin se mund të “krijonin imazhe nudo jo konsensuale“. Të hënën, faqja publikoi një raport që eksploronte se si kompanitë po përdornin reklamat në Instagram për të promovuar aplikacione që mund të “zhveshin çdo vajzë falas”.
Disa nga këto reklama në Instagram i çuan përdoruesit direkt në App Store për të bërë të mundur shkarkimin e një aplikacioni që përshkruhej si një “gjenerues arti“.
404 Media i denoncoi rastet drejt Apple, duke ofruar pamje të reklamave që shfaqeshin nëpër rrjete sociale, dhe vetëm atëherë kompania u përgjigj duke hequr 3 aplikacione nga dyqani.
Kjo sugjeron që gjigandi i teknologjisë nuk ishte në gjendje të gjente aplikacione që shkelnin politikat e tij të App Store pa ndihmë të jashtme. Raporti thoshte se ata hasën pesë reklama të tilla duke shfletuar Ad Library të Meta, një vend ku arkivohen të gjitha reklamat në platformë. Disa nga këto aplikacione ofronin ndërrimin e fytyrave në imazhet eksplicite dhe disa u tregtuan si aplikacione të cilat përdornin AI për të hequr rrobat nga fotot normale të një personi.