Raportuesi Mark Gurman nga Bloomberg tregoi kohët e fundit se Apple me shumë mundësi do të prezantojë një aplikacion të dedikuar për menaxhimin e fjalëkalimeve në versionet e ardhshme të softuerit të tij për iPhone, iPad dhe Mac: iOS 18, iPadOS 18 dhe MacOS 15.
Informacionet vijnë nga njerëz të brendshëm me njohuri për hapat e ardhshëm të kompanisë së bazuar në Cupertino dhe dëshirojnë të mbeten anonim pasi njoftimi nuk është bërë ende publik. Ekziston një mundësi që aplikacioni të quhet “Passwords” dhe synon të konkurrojë me lojtarët e mëdhenj në treg, si 1Password dhe LastPass. Detajet e plota do të zbulohen në Worldwide Developer Conference që do të zhvillohet më 10 qershor.
Apple i menaxhon fjalëkalimet edhe momentalisht përmes Keychain të saj iCloud, megjithatë nuk është aq i thjeshtë në përdorim në iOS. Një aplikacion i ri i dedikuar duhet të jetë më i lehtë për t’u përdorur, veçanërisht duke parë disa nga shërbimet e tij paraprake.
Këto shërbime përfshijnë lejimin e përdoruesve të importojnë fjalëkalimet e tyre nga aplikacionet e tjera të menaxhimit të fjalëkalimeve. Gjithashtu, aplikacioni i kategorizon fjalëkalimet tuaja në lista të ndryshme me seksione për fjalëkalimet tuaja, rrjetet Wi-Fi dhe çelësat e fjalëkalimeve.
Ashtu si Google Authenticator, raportohet se do të jetë gjithashtu në gjendje të lehtësojë kodet e verifikimit dhe të veprojë si një aplikacion vërtetimi për two-factor authentication. Aplikacioni Passwords do të mund të përdoret dhe në headset-in Vision Pro si dhe në pajisjet Windows.
