Amazon ka vendosur të ndërmarrë një aksion ligjor kundër administratorëve të më tepër se 10,000 grupeve në Facebook, të cilët i përdornin këto grupe për të gjeneruar review të rreme produktesh në Amerikë, Mbretërinë e Bashkuar, Gjermani, Franë, Itali, Spanjë dhe Japoni.
Gjigandi i teknologjisë thotë se këto grupe i ofrojnë njerëzve para ose produkte falas në shkëmbim të një review të mirë të publikuar në Amazon. Një ndër këto grupe, i cili u fshi nga Facebook gjatë këtij viti, kishte më tepër se 43,000 anëtarë. Ai quhej “Amazon Product Review”.
Sapo njerëzit që kishin marrë produktet kishin bërë review e tyre, administratori i grupit do t’i jepte para në shkëmbim. Produktet që qarkullonin ishin nga shumë kategori të ndryshme, si përshembull pjesë makine dhe tripod kamerash.
Numri i madh i reviews, sidomos atyre pozitive, rrisin pozicionin e shitësve në rezultatet e kërkimit në platformat e Amazon. Administratorët e grupeve fshehën disa shprehje kryesore që do të kapeshin automatikisht nga Meta si “R*fnd aftr R*vew” (Refund after Review).
Rreth gjysma e këtyre grupeve të raportuara nga Amazon u mbyllën nga Meta, mirëpo Amazon ka vendosur që të nisë një betejë gjyqësore kundrejt këtyre administratorëve. Në Mbretërinë e Bashkuar është e jashtëligjshme të paguhesh për të shkruajtur një review të rreme.
