Nëse ju keni në shtëpi një kompjuter të vjetër i cili ka shumë vite pa u update-uar dhe nuk ka një performancë të mjaftueshme për të kryer veprime bazë, mund të ketë ardhur momenti që ta riktheni në jetë duke instaluar Chrome OS në të.
Ju mund të falenderoni Google për këtë mundësi, pasi përmes sistemit operativ Chrome OS Flex, kompjuterat e vjetër mund të “ringjallen”. Gjithçka që ju duhet është një USB drive dhe dëshira për të përdorur sistemin Chrome OS në pajisjen tuaj.
Edhe pse Google e quan Chrome OS Flex një projekt jo stabël, ideja është shumë tërheqëse. Kërkesat minimale që duhen për të instaluar këtë sistem operativ në PC tuaj janë 4GB RAM dhe 16GB internal storage. Gjithashtu duhet që pajisja juaj të ketë një CPU 64-bit.
Duhet të paralajmërojmë të gjithë lexuesit se me instalimin e Chrome OS Flex ju do të keni disa limitime, ku më kryesoret janë mungesa e Google Play dhe aplikacioneve Android. Ju nuk do të keni as Parallels Desktop support, dhe sistemi nuk do të mund të instalohet në kompjuterat ARM.
