Korea e Veriut është zhdukur së paku 2 herë nga interneti gjatë muajit të fundit, ku të gjithë website-t e drejtuara nga qeveria ishin të paaksesueshme. Përgjegjës për këtë problem madhor për të gjithë shtetin e Koresë së Veriut ishte një haker i vetëm nga SHBA.
Hakeri amerikan me emrin P4X tregoi për Wired se para disa kohësh ai ishte viktimë i një sulmi kibernetik gjatë vitit të kaluar nga spiunët e Koresë së Veriut. Ai ishte tepër i irrituar me faktin se kishte rënë pre e këtij sulmi dhe se SHBA nuk kishte asnjë përgjigje ndaj këtij fenomeni.
Ai tha se hakerat tentuan të vidhnin informacionet e tij mbi dobësitë e software-it por për fat të mirë arriti t’i ndalonte para se ato të gjenin informacione me vlerë. Dhe pse hakerat nuk arritën të zbulonin asgjë, P4X mbeti i fyer nga ky sulm dhe vendosi të sulmonte serverat e këtij shteti.
“Unë besoj se kjo ishte gjëja e duhur që duhet të bëja.” tha P4X për Wired. “Nëse ato nuk e shohin që dhe ne kemi dhëmbë, ato do të vazhdojnë të na sulmojnë. Unë dua që ato të kuptojnë se nëse na sulmojnë, duhet të jenë të përgatitur që infrastruktura e tyre do të kolapsohet për një periudhë kohore.”
Ai shtoi se ishte tepër interesante se sa e thjeshtë ishte e gjithë procedura, e cila në pjesën më të madhe ishte e automatizuar.
