Epic ka publikuar përshkrimin e vitit të kaluar për të parë se si kompania arriti të performonte gjatë këtij viti. Tashmë Epic Games Store ka 193 milionë përdorues në PC, 34 milionë më tepër se në vitin 2020 dhe numri i lojrave në këtë dyqan është 917, pothuajse 2 herë më shumë se në vitin e kaluar.
Një lajm shumë i mirë është se kompania ka vendosur të vazhdojë ofrimin e lojrave falas çdo javë gjatë 2022. “Fillimisht, ne jemi tepër të emocionuar të konfirmojmë se ofrimi i lojrave falas do të vazhdojë dhe përgjatë 2022.” u shpreh kompania. Gjatë vitit të kaluar u morën 756 milionë kopje të 89 lojrave të ofruara falas nga dyqani. Loja falas e kësaj jave do të jetë Daemon X Machina.
Në një ditë të vetme Epic Games Store regjistroi 31.1 milionë përdorues të përditshëm. Të gjithë përdoruesit e saj shpenzuan rreth $840 milionë, 20% më tepër. 36% e të gjithë shitjeve janë bërë në lojra të palës së tretë.
Kjo është një rritje mjaft e mirë për një vit pune. Në pjesën e mbetur të deklaratës së tyre u fol se si kompania ka ofruar shërbime të reja gjatë 2021, duke përfshirë këtu të shumëpriturën shopping cart, achievements dhe mbështetja e valutave të ndryshme. Gjithashtu ju do të mund të radhisni lojrat në seksionin e shkarkimit.
