Sony i është përgjigjur blerjes së Activision Blizzard nga Microsoft përmes komenteve mbi të ardhmen e lojërave të kompanisë, si përshembull Call of Duty, në konsolat PlayStation.
“Ne presim që Microsoft të respektojë marrëveshjet kontraktuale ekzistuese dhe do të sigurojë që lojrat Activision të jenë në të dyja platformat.” tha një zëdhënës i Sony për Wall Street Journal.
Nuk është surprizues fakti se Sony pret që marrëveshjet kontraktuale të respektohen, pasi Microsoft lejoi që Deathloop të publikohet në PS5 dhe pas blerjes së Bethesda Softworks. Sapo marrëveshjet kontraktuale të skadojnë Microsoft ka të drejtën t’i bëjë këto një ekskluzivitet të Xbox.
Pyetja më e madhe qëndron rreth të ardhmes së Call of Duty, pasi kjo është një lojë shumë e pëlqyer në të dyja platformat. Sony ka patur një marrëveshje për Call of Duty me Activision për më tepër se 5 vite. Madje ish-CEO I PlayStation Andrew House tha gjatë E3 në vitin 2015 se “PlayStation është shtëpia e re e Call of Duty”. Në nëntor të 2021 u bë e ditur se Call of Duty: Black Ops Cold War ishte loja e dytë më e luajtur në PS5 pas Fortnite.
Sapo këto marrëveshje të përfundojnë, Sony do të jetë e pafuqishme për të përcaktuar të ardhmen e Call of Duty në PlayStation. Blerja e Bethesda nga Microsoft bëri që Starfield të kthehet në një lojë ekskluzive për Xbox dhe PC.
