Nëse ju prej kohësh keni kërkuar për PS5 dhe nuk keni gjetur, me shumë mundësi kjo gjë ka ndodhur për shkak të mungesës së proçesorëve gjysëmkonduktor në treg. Ky problem filloi vitin e kaluar gjatë pandemisë së COVID-19, ku shumica e fabrikave u mbyllën.
Kjo mungesë e proçesorëve vazhdoi përgjatë gjithë vitit 2021, dhe nuk ka përfunduar akoma. Mirëpo a do të vazhdojë të ekzistojë ky problem përgjatë gjithë vitit 2022?
Për sa i përket smartphone-ve dhe pajisjeve personale pritet që gjendja të përmirësohet gjatë gjysmës së dytë të këtij viti. Këtë mendim ndajnë Cristiano Amon, CEO i Qualcomm dhe Colette Kress nga Nvidia. Gjithashtu furnizuesi i iPhone-ve, Foxconn tregon se porositë e iPhone 13 do të vonohen disi. Për shkak të kësaj mungese Apple ka humbur mbi $9 miliardë.
Kompjuterat përdorin proçesorë 10 ose 14nm të cilat janë më të vështira për t’u prodhuar dhe për këtë arsye sektori i PC mund të shohë një rritje të ngadalësuar.
Prodhuesit e makinave janë “viktimat” më të mëdha të mungesës së proçesorëve. Disa analistë të ndryshëm tregojnë se ky sektor do të hasë probleme për shkak të mungesës së tyre deri në 2023.
2021 has been the year of super crazy supply chain shortages, so it wouldn’t matter if we had 17 new products, as none would ship.
Assuming 2022 is not mega drama, new Roadster should ship in 2023.
— Elon Musk (@elonmusk) September 1, 2021
Volvo tha se kohët e fundit ka patur disa përmirësime me këtë situatë megjithëse fitimiet e këtij viti ishin rreth 7% më pak se vitin e kaluar. CEO i Nissan, Makoto Uchida tregoi se mungesa e proçesorëve në treg mund të rrezikojë planet e ardhshme të kompanisë. BMW u detyrua të prodhonte disa modele pa shërbimin touchscreen dhe backup assistant për parkimin, funksione që kërkojnë praninë e proçesorit gjysëmkonduktor.
Megjithatë me investimet shumë të mëdha që po bëhen për të rritur kapacitetet e prodhimit të fabrikave, besojmë se gjendja do të stabilizohet së shpejti.
