Punimi nga shtëpia e ka bërë punën më të thjeshtë se kurrë, por shpesh herë mund të qëllojë që ne të punojmë jashtë orarit gjatë periudhave festive.
Mirëpo një raportim i ri tregon se punimi gjatë festave ka një kosto të lartë mendore dhe fizike për këto persona. Studiuesit në University of South Australia vëzhguan mbi 2,200 akademikë dhe staf profesional gjatë vitit në 40 universitete të ndryshme australiane dhe zbuluan se kontrollimi i email-eve të reja gjatë Krishtlindjeve mund të çojë në lodhje mendore dhe shëndet të dobët fizik. Kjo gjë mund të ndikohë dhe në marrëdhëniet familiare të tyre.
“Që nga fillimi i pandemisë, shumë kompani kanë aplikuar punimin nga shtëpia, por përmes dixhitalizimit të punës kufijtë e saj janë bërë më të zbehtë, duke bërë që punonjësit të jenë aktivë dhe jashtë orarit zyrtar të punës.” tha Dr Amy Zadow, psikologe në University of South Australia. “Mirëpo të qënurit gjatë gjithë kohës aktivë në punë limiton mundësinë e pushimit për njerëzit ose takimin e tyre me miqtë, duke bërë që ato të ndihen tepër të lodhur.”
Nga 2,200 personat e marrë në studim, 26% e tyre ndiheshin sikur ishin të detyruar t’i përgjigjen mesazheve që lidhen me punën nga supervizorët gjatë periudhës së pushimit. Një tjetër 57% i pjesëmarrësve tha se ato kanë dërguar mesazhe që kishin lidhje me punën dhe në mbrëmje.
Të gjithë personat që ishin aktivë dhe pas orarit zyrtar të punës raportuan për nivele të larta të lodhjes mendore (56%). Ato treguan se ishin tepër të ngarkuar emocionalisht dhe kishin një shëndet të dobët fizik.
