Makina e parë elektrike garash do të prezantohet në konferencën COP26 mbi ndryshimet klimatike. Ajo është zhvilluar nga Envision Virgin Racing dhe Johnson Matthey dhe prototipi ka një shpejtësi maksimale prej 240 km/h.
Kjo është makina e parë që përdor qelizat e plota litium nga teknologjia e avancuar eLNO me katodë të pasur me nikel nga Johnson Matthey. Këto materiale kanë 20% më tepër densitet energjie se bateritë që janë në përdorim ditët e sotme dhe mund të sigurojnë një autonomi dhe jetëgjatësi më të mirë të baterisë.
Këto bateri pritet të fillojnë të prodhohen në masë duke nisur nga viti 2024 dhe do të mund të përdoren dhe nga makinat e tjera jo-sportive ose SUV.
Dizenjuesit e këtij prototipi shpresojnë se kjo makinë garash do të inspirojë tranzicionin drejt të ardhmes tërësisht elektrike dhe përdorimit të gjërë nga njerëzit në të gjithë botën. “Kjo makinë garash dy-vendëshe u dizenjua specifikisht për të testuar dhe për të shtyrë performancën e baterisë në limitet e saja.” tha drejtuesi i menaxhimit në Envision Virgin Racing, Sylvain Filippi.
“Teknologjia e baterisë është tërësisht ndryshe nga gjithçka që është përdorur deri më sot, dhe ne krijuam një makinë prototip që do të tregojë potencialin e madh të kësaj baterie. Duke e testuar atë në një pistë garimi ne do të përfitojmë të dhëna të sakta mbi performancën e saj.”
