Vetëm një veprim i yllit të futbollit Cristiano Ronaldo arriti të ulë vlerën e Coca-Cola në treg me $4 miliardë. Gjatë një konference për shtyp para ndeshjes Hungari – Protugali në Euro 2020, Ronaldo largoi dy shishet e Coca-Cola që ishin vendosur para tij dhe i bëri thirrje njerëzve të pijnë ujë.
Gjatë ditës së hënë aksionet e Coca-Cola po shiteshin në çmimin $56,17, por në fundin e konferencës ato ranë me 1,6% në $55,22. Më pas erdhi dhe rënia e menjëhershme e vlerës në treg me $4 miliardë.
Coca-Cola është një ndër sponsorët zyrtarë të UEFA Euro 2020. Pas këtij veprimi, përgjigjja e tyre ishte se “çdo njeri ka të drejtën e preferencës së pijeve në bazë të shijeve dhe nevojave.” Një zëdhënës i Euro 2020 bëri me dije se lojtarëve në konferenca i ofrohet ujë bashkë me një Coca-Cola normale dhe një Zero Sugar.
Ronaldo njihet si një ndër atletët më të mirë në botë, dhe ka shprehur hapur mendimin e tij kundër pijeve të pashëndetshme. Ai ndjek një rutinë mjaft strikte për të mbajtur trupin në formë me gjashtë vakte dhe bën nje gjumë të shkurtër për të paktën 5 herë në ditë. Në 2020 ai tha se irritohet shumë kur sheh djalin e tij që konsumon pije të pashëndetshme.
