Zakoni i hapjes së qindra tab-eve njëkohësisht do të bëhet edhe më i menaxhueshëm tashmë në Chrome.
Përdorues në Chrome 88 janë duke testuar me një opsion i cili të lejon që skedarët e hapur në pjesën e sipërme t’i bësh scroll, njësoj si Storyt në Instagram, majtas ose djathtas. Kjo për të mos i zvogëluar ato gjatë navigimit dhe për ta bërë më të lehtë gjetjen e skedës së dëshiruar pa i hapur të gjitha me radhë.
Kalimi midis tyre do të mund të bëhet me anë të mouse ose edhe me shigjetat e tastierës.
Përveç aftësisë për të rrëshkitur mes tab-eve edhe dimensionet e tyre janë duke iu nënshtruar modifikimit. Mesa duket përdoruesi do të mund të zgjedhë midis paraqitjes së ikonave të vogla, të mesme ose të mëdha.
Në këtë moment është e pamundur të mësohet se kur do të mund ta shohim të aplikuar në Chrome zyrtar, por është bukur të shohësh diçka të tillë edhe në browserin më të përdorur, Firefox dhe Safari kanë opsione të ngjashme prej kohësh.
