iOS 14 së bashku me gjithë zhurmat që solli u lançua në shtator 2020. Versioni më i fundit iOS 14.4 erdhi në 26 janar, duke ndjekur logjikën dhe traditën nuk jemi larg nga përditësimi i radhës. Kur do të vijë dhe çfarë na pret në te?
iOS 14.5 ka hyrë në fazën beta, ndaj që të kesh akses në të duhet të jesh zhvillues. Një beta për publikun mund të jetë e disponueshme ndoshta edhe javën e ardhshme. Ama data e më e afërt e parashikuar i takon javëve të fundit, për dalje zyrtare dhe solide.
Aparatet të cilat do ta marrin atë janë normalisht të gjitha ato që kanë marrë iOS 14, pra nga iPhone 6 deri tek iPhone 12. Listës i shtohen edhe iPhone SE por edhe iPod Touch.
Sa i përket opsioneve të reja këto janë parashikimet e para:
Zhbllokimit të smartphonit me FaceID do t’i vijë në ndihmë Apple Watch. Tani që maska na prish punë për identifikimin e saktë, smartphoni do t’i dërgojë një vibrim orës smart në mënyrë që të të vërë në dijeni, kur iPhoni yt është hapur nga dikush.
Sistemi i ri do të mundësojë streaming të rutinave të stërvitjes Apple Fitness Plus direkt në televizorë dhe aparate me AirPlay 2.
Aplikacionet do të duhet të të marrin leje nëse duan të gjurmojnë aktivitetin tënd, opsion i cili ka shkaktuar zhurmë mes platformash.
Më në fund do të kemi një iPhone me dy karta. Duke shfrytëzuar eSIM digjital, përdoruesit do të kenë mundësinë të mbajnë dy numra me përditësimin e ri. Ky opsion ishte i disponueshëm vetëm në Kinë deri tani.
Siri do të telefonojë numrat e emergjencës për ty, mjafton t’i thuash “Siri, telefono emergjencën“. Ajo do të të japë 3 sekonda kohë në rast se dëshiron ta anullosh.
Dhe në fund, lajm fantastik për dashuruesit e video lojrave, pasi sistemi i ri do të mbështesë kontrolluesit e PS5 dhe Xbox Series X, për të luajtur lojrat e tua të preferuara edhe me levat e konsoleve.
