Që Amazon ishte e destinuar për t’u bërë firma më e mëdhe e logjistikës dhe transportit të mallrave në botë kjo u pa me kohë. Blerja më e fundit nga kompania na e vërteton vazhdimisht se ndërsa për disa 2020 ka qenë disfatë, për të tjerë si Jeff Bezos ka qenë më se fitimprurës.
Mësohet se flotës së avionëve të Amazon i shtohen edhe 11 të tjerë, kësaj radhe ama jo në kontratë leasing por në pronësi të plotë. 7 nga Delta dhe 4 nga WestJet. Kjo është hera e parë që kompania blen avionë, në vend që t’i marrë me qera, kjo vjen sigurisht pas efekteve të pandemisë. Për shkak të bllokimeve masive të fluturimeve nëpër botë, kompanitë ajrore kanë nxituar të ulin numrin e flotave të veta, e kësisoj edhe çmimet e avionëve kanë rënë ndjeshëm.
Flota e parë Amazon nisi në 2016 me qëllim që brenda 2022 të kishte 85 avionë në leasing por edhe në pronësi. Këto blerje të reja do të operohen nga kompani të dyta por do të dërgojnë pako vetëm brenda USA.
Amazon është një gjigand i transportit të mallrave, por shumë marrveshje të fundit të saj sugjerojnë se Bezos ka në plan t’a zhvillojë kompaninë përtej transportit të vetëm pakove.
Bileta udhëtimi AmazonAir nuk do ishin ndonjë çudi e madhe.
