Vit i çuditshëm ky që po lëmë pas, shenjat e tij do i ndjejmë për një kohë të gjatë. Edhe bota e teknologjisë pati evenimentet e veta, por pa u zgjatur listojmë këtu ato ndryshime efektet e të cilave do i ndjejmë edhe në vitet që vijnë.
1. Zoom
Askush nuk e dinte kush ishte përpara se në mes të një pandemie të nevojitej një platformë e thjeshtë për të zëvendësuar digjitalisht çdo grumbullim. Ishte pikërisht lehtësia në përdorim dhe akses ajo që i mundësoi suksesin e madh Zoomit. Aq i fortë ndikimi i saj sa gati çdo rrjet social ka krijuar versionin e vetë të video-conferencing.
2. Mac me M1
Nga të gjithë kompiuterët e prodhuar këtë vit asnjëri nuk bëri zhurmën e Mac-ëve me proçesorin e vetë silikon të Apple, M1. Deri dje Intel mbante fronin e prodhuesit të çipave silikon, vendimi i Apple përbën rrezik të pa-diskutueshëm për gjithë tregun. Kombinimi i performancës së lartë me baterinë që zgjat gjithë ditën pa bërë kompromise të tjera, është goxha përparim.
3. Smartphonët e palosshëm
Teknologjia vazhdon ende të jetë eksperimentale, por fakti që një sërë produktesh si Z Fold dhe Duo kërkohen nga tregu, tregon besueshmëri. Pavarsisht vështirësive ato ofrojnë performancë dhe një mënyrë ndryshe të përdorimit, aq ide e mirë është kjo sa edhe vetë Apple po punon një version të vetin.
4. Streaming
Mbyllur në shtëpi, larg aktiviteteve koha e lirë u mbush me filma e seriale. Netflix vazhdon të mbizotërojë, dhe buxhetet e veta sa vjen e fryhen më shumë. Por kaq i lartë ishte interesi sa edhe platformat që lindën së fundmi panë frekuentim rekord. Përmendim Apple TV dhe Disney+ kjo e fundit u lançua në 2019 e brenda vitit mblodhi 80 milion abonentë.
5. Eventet online
Nga lançimet e produkteve, seminarët e mëdhenj e gjithë panairet që mblidhin vëmendjen e gjithë botës, gjithçka u bë online këtë vit. Artistët përdorën Fortnite për skenë koncertesh, trajnimet online, gjithçka vetëm për të shmangur grumbullimet masive. Asgjë nuk e zëvendëson takimin aty për aty, por të paktën kuptuam se edhe kështu mund të funksionohet.
6. 5G
5G-ja u përfol shumë sidomos prej lançimit të iPhone 12. Por përkundër edhe pretendimeve të konspiracionistëve, kush e bleu një smartphone me 5G e ka shijuar vetëm si simbol në ekran. Infrastruktura aktuale nuk është ende gati për një funksionim të besueshëm, pjesa më e madhe ende funksionon vetëm me 4G, por sidoqoftë ato pak përdorime treguan potencialin e madh të gjeneratës së re të internetit.
7. Privatësia
Ky vit pa ndryshime në legjistlacion dhe madje një luftë aktuale që qeveritë nëpër botë kanë me mënyrën si platformat gjigande përdorin të dhënat tona të ndjeshme. E në fakt edhe vetë platformat i janë vënë kundër njëri tjetrit, kujtojmë këtu rastin e Apple e cila me iOS 14 do të pikasë çdo moment që aplikacionet mbledhin informacione mbi ty. Duke ndërruar pozicionin e përdoruesit në raport me offuesin e shërbimit. Facebook e të tjerë duhet të mendojnë mirë se çfarë do të shfaqet në tabelën e iOS dhe përshkrimin në App Store.
