Në ditët kur po palosim xhamat e smartphonëve dhe kalojmë nga telefon në tablet, për laptopët e mirfilltë është e vështirë që të sjellin diçka që të na çudisë. E megjithatë herë pas here kompanitë arrijnë të kalojnë pragun e ekperimentimeve me formën dhe sjellin funksione krejt interesante dhe pionere për fushën.
Ky është edhe rasti i HP me EliteBook 10, një linjë laptopësh me diversitet parametrash nga më të fundit por me dy opsione të reja krejt të veçanta; Presence Aware dhe Noise Reduction.
E para është një teknologji kaq e mirqenë sa çuditemi pse nuk është implementuar më parë. Ajo ka të bëjë me aftësinë e aparatit për të kuptuar kur largohesh prej tij e më pas të fikë ekranin e të kyçet për të mos lejuar askënd të fusë hundët në punët e tua. E rindezja më pas është po aq e shpejtë, për t’u futur në të nevojitet një nivel sigurie, pin, kod apo çfarëdo. Njejtë si një smartphone.
Teknologjia e dytë vjen fiks në kohën e duhur atë të videokonferencave. Mikrofonët e EliteBook 10 shoqërohen nga AI e aftë për të niveluar zhurmat në sfond e për t’u përqëndruar tek zëri yt. Mënyrë shumë e mirë për të siguruar privatësi edhe sa i përket bisedave rreth teje në ambientet e shtëpisë etj. Noise Reduction është teknologji e aplikuar në masë nga gjeneratat e reja të kufjeve por jo fort e zakonshme mes laptopëve.
Këto sisteme nuk është se po prezantohen për herë të parë në histori, Dell ka prezantuar koncepte të ngjashme kohë më parë ndërsa për vetë HP kjo është thjesht hera e parë që shihen të ofruara për konsumatorin dhe jo për kategorinë e biznesit.
