Dëshira dhe nevoja për telekomunikim sa më të shpejtë tregohet qartë edhe në avancimet që shtetet e rajonit bëjnë me njeri tjetrin. Thënë kjo edicioni i tretë i Samitit Digjital të Ballkanit Perëndimor i hapur sot në Tiranë vazhdon të çojë përpara pretendimet e dialogut të parë të zhvilluar në Shkup 2018.
Ky vullnet rajonal ka si qëllim kryesor themelimin e bashkëpunimit për infrastrukturën 5G mes vendeve të Ballkanit Perëndimor e poashtu të ulë në zero kostot e roaming brenda korrikut 2021.
Majlinda Bregu, në funksionin e Sekretares së Përgjithshme të Këshillit pë Bashkëpunim Rajonal tha se hapi i parë i Marrëveshjes Rajonale për Roaming ishte ulja e tarifave. Për rrjedhojë sot rajoni paguan 83% deri në 96% më pak për shërbim jashtë republike. Hapi i radhës kërkon të arrijë në kostot zero e që aty pretendohet edhe ulja e tarifave për qytetarët e Ballkanit Perëndimor në Bashkimin Evropian.
Ndër të tjera ajo citoi të dhënat e Balkan Barometer 2020, të cilat flasin për 80% të menaxherëve në rajon të cilët besojnë se aftësitë digjitale janë thelbësore në mbarvajtjen e biznesit. Ndaj edhe ofrimi i infrastrukturave teknologjike duhet të jetë prioritet i qeverive të kësaj pjese të Evropës.
Duke filluar nga sot deri në 28 tetor mund të ndiqen disa sesione online mbi: Lidhja e Rrjetit dhe Shërbimeve, Besimi dhe Siguria, Aftësitë Digjitale, Ekonomia Digjitale.
Ndërsa mbyllja e samitit do të mbahet më 2 nëntor.
