E kush tha që vetëm njerzit duhet të përfitojnë nga avancimet teknologjike? Ushtria e SHBA ka vendosur të sjellë syze A.R edhe për mikun më të mirë të njeriut.
Qentë e misioneve, janë më se të dobishëm pasi shpesh futen në vende ku është e pamundur për njeriun, e madje kryejnë edhe misione të rrezikshme. Komandimi i tyre deri tani ka qenë primitiv, me sinjale ose rreze lazer. Për të shtuar efikasitetin e tyre, laboratori i kërkimit të ushtrisë amerikane, ka vendosur të sjellë syzet me realitet të përzjerë. Komanduesi do të ketë pamjen e asaj që kafsha është duke parë, por edhe do të mund t’i japë shenja vizuale të cilat me trajnimin e duhur do ta shkathtësojnë edhe më mirë katër putrorin.
Secila palë syzesh do të kërkojë të prodhohet specifikisht për secilin qen. Qentë e ushtrisë janë mësuar me mbajtjen e syzeve pasi i përdorin shpesh në misione ajrore.
Një teknologji e tillë ka goxha potencial të shtohet edhe tek qentë e zjarrfikësve, për të asistuar në raste katastrofash, apo edhe në përdorime më të thjeshta të jetës, si qentë që kujdesen për njerëz me aftësi të kufizuara etj.
