Një tentativë për krim kibernetik ka përfunduar në përmasa tragjike teksa ka marrë një jetë me vete.
Sistemet e Klinikës Universitare të Duesseldorfit kanë qenë të korruptuar që të enjten e shkuar, kjo si rrjedhojë e një sulmi hackerash në një pikë të dobët të sistemit. Për pasojë sistemet kanë pushuar së funksionuari dhe personeli nuk ka mundur të ketë akses në të dhëna, pacientët e emergjencave u lëvizën diku tjetër dhe operacionet u shtynë.
30 servera të spitalit ishin enkriptuar javën e shkuar dhe një gjurmë zhvatje kishte mbetur në njërin prej tyre, nga ku ishte gjetur mënyra e kontaktit me shkelësit dhe për më tepër ishte kuptuar se shenjestra kishte qenë në të vërtetë Heinrich Heine University me të cilin spitali i Duesseldorfit është i lidhur, dhe jo spitali vetë.
Policia e Duesseldorfit arriti të krijonte kontakt dhe u tha autorëve të krimit se ishte spitali dhe jo universiteti ai që ish prekur, duke rrezikuar kështu jetën e pacientëve. Keqbërësit hoqën dorë nga tentativa e zhvatjes dhe dorëzuan një çelës për të dekriptuar serverat e më pas u zhdukën njëherë e mirë.
Për fat të keq ngjarja nuk kaloi pa viktima, pasi një paciente e cila duhet të çohej në spital ditën e premte u dërgua në një spital tjetër në Wuppertal, 32km më larg. Për shkak se doktorët nuk mundën t’i jepnin mjekimin e duhur për më shumë se një orë, e për fat të keq ajo humbi jetën.
Kjo ndodhi na jep padyshim të kuptojmë se në 2020 varemi shumë nga teknologjia dhe jemi pothuajse të paaftë të funksionojmë pa të në raste emergjente. Por nga ana tjetër na jep të kuptojmë seriozitetin e madh të krimeve kibernetike.
