Kush e përdor smartphonin apo PC për të lexuar artikuj e di mirë se sa i rëndësishëm është opsioni i ruajtjes për më vonë. Zakonisht në rrjete sociale funksionon më së miri, por në browsers si Chrome, mungesa i ndjehet shumë.
Nëse do të ruash një artikull për më vonë mund ta bësh bookmark, ta shtosh tek shënimet, ta ruash si draft në email etj. Le të gëzohemi të gjithë pasi më në fund Google do të sjellë një buton të dedikuar këtij veprimi. Shumë shpejtë do të shtohet një flamur për të shenjuar materiale “Read Later” (lexo më vonë).
Butoni më pas do të lejojë të futesh tek menuja me gjithë skedarët e ruajtur për më vonë. Nuk dihet ende si do të duket por informacioni është i sigurtë sipas XDA Developers.
Një tjetër arsye shumë e rëndësishme për ta sjellë këtë funksion është edhe uria e madhe e Chrome për RAM. Kur do të lexosh diçka më vonë natyrshëm thjesht e lë hapur, por kur numri i skedave rritet e njëjta gjë ndodh edhe me konsumin e RAM-it. Ndaj mbyllja dhe ruajtja për më vonë duhet të reflektohet në këtë sektor dhe kompiuteri duhet të performojë më mirë.
Teorikisht të paktën.
