Samsung ka zyrtarizuar organizimin e edicionit të radhës të Galaxy Unpacked, i cili do të mbahet më 22 korrik në Londër në orën 15:00. Si zakonisht, kompania pritet ta shfrytëzojë këtë skenë për të prezantuar gjeneratën më të re të pajisjeve të saj premium, me fokus të veçantë tek telefonët me ekran të palosshëm dhe ekosistemi Galaxy.
Sipas raportimeve, në qendër të prezantimit pritet të jenë modelet Galaxy Z Fold 8 dhe Galaxy Z Flip 8, ndërsa nuk përjashtohet debutimi i një modeli krejtësisht të ri me ekran më të gjerë, i cili shihet si përgjigjja e Samsung ndaj konkurrencës në rritje në segmentin e telefonëve foldable. Krahas tyre, priten edhe përditësime të rëndësishme në funksionet e bazuara në inteligjencën artificiale.
Një detaj që ka tërhequr vëmendjen është edhe ftesa zyrtare e eventit. Grafika përmban një biletë e cila ka të grisur pjesën e sipërme të saj, ndërsa shoqërohet me sloganin “A new shape unfolds”.
Ky kombinim mund të interpretohet si një sinjal i qartë se Samsung nuk do të prezantojë vetëm një përditësim rutinë, por një kategori ose format të ri pajisjeje, me synimin për të ofruar një përvojë më afër një tableti pa sakrifikuar përmasat e një telefoni.
