Pas më shumë se dy dekadash në zemër të industrisë së teknologjisë, babai i internetit Vinton Cerf pritet të largohet javën e ardhshme nga roli i tij si “chief internet evangelist” i Google, duke mbyllur një kapitull historik në evolucionin e internetit. Lajmi u konfirmua zyrtarisht nga kompania, ndërsa momenti i njoftimit u shoqërua me duartrokitje në konferencën Open Frontier, organizuar nga Laude Institute.
Gjatë një komunikimi me video, Cerf u nderua publikisht nga Dave Patterson, profesor në University of California, Berkeley, i cili e përshkroi karrierën e tij si “relativisht të mirë”, një ironi e lehtë për një figurë që konsiderohet gjerësisht si një nga arkitektët e internetit modern.
Së bashku me Robert Kahn, Cerf është kredituar për zhvillimin e protokolleve TCP/IP, themeli mbi të cilin funksionon interneti sot. Kontributet e tij janë vlerësuar me çmime madhore si Presidential Medal of Freedom dhe Turing Award.
Në panelin ku foli Cerf morën pjesë edhe emra të tjerë të njohur të open source dhe AI, si François Chollet, krijuesi i Keras, John Ousterhout, autori i gjuhës Tcl, dhe Matei Zaharia, bashkëthemelues i Databricks.
Diskutimet u përqendruan te e ardhmja e AI dhe rreziku i centralizimit, ku Cerf paralajmëroi se agjentët autonomë të AI do të detyrojnë industrinë të kthehet drejt standardeve të hapura dhe ndërveprueshmërisë. Në stilin e tij karakteristik, ai theksoi se gjuha natyrore është shumë e paqartë për komunikim mes agjentëve, duke shtuar me humor se “një grup agjentësh që flasin anglisht me njëri-tjetrin është paksa i frikshëm”.
Me largimin e Cerf-it nga Google, industria humbet jo vetëm një drejtues vizionar, por edhe një simbol të epokës kur interneti u ndërtua mbi bashkëpunim, standarde të hapura dhe ide që i rezistuan kohës.
