Industria e inteligjencës artificiale mund të jetë pranë një lufte çmimesh, dhe në qendër të saj qëndron OpenAI. Sipas një raportimi të Wall Street Journal, kompania po shqyrton ulje të ndjeshme çmimesh në të gjithë gamën e produkteve, si një mënyrë për të frenuar pakënaqësitë në industri dhe për të mbajtur hapin me rivalët gjithnjë e më agresivë.
Burime anonime pranë kompanisë thonë se OpenAI, nën drejtimin e Sam Altman, po diskuton uljen e kostove të përdorimit për abonentët, përfshirë edhe çmimet e token-ëve, një nga burimet më të kërkuara dhe njëkohësisht më të kushtueshme për bizneset. Lëvizja vjen si reagim ndaj një fenomeni që po përflitet gjerësisht në Silicon Valley, “tokenmaxxing”, pra djegia masive e token-ëve dhe buxheteve për të rritur produktivitetin e produkteve AI.
Sipas raportit, drejtues biznesesh në mbarë industrinë po ankohen hapur për kostot e larta të AI. Vetë Altman e ka pranuar së fundmi se çmimet janë “një problem i madh”, megjithëse vendimi përfundimtar për uljet ende nuk është marrë. Ndërkohë, entuziazmi i investitorëve për AI duket se po ftohet, sidomos pas luhatjeve në bursë të gjigantëve si Nvidia.
Megjithatë ndërsa flitet për ulje çmimesh, OpenAI po bën hapa gjithnjë e më të vendosur drejt fitimit. Kompania ka konfirmuar zyrtarisht se po përgatitet për një IPO, me thashetheme që e vendosin daljen në bursë që në shtator dhe me një vlerësim potencial deri në 1 trilion dollarë. Në të njëjtën linjë, edhe Anthropic ka ndërmarrë hapa për kalimin drejt statusit publik.
