OpenAI ka arritur një tjetër moment historik në industrinë e teknologjisë, pasi ChatGPT ka kaluar shifrën e 1 miliard përdoruesve aktivë mujorë në mbarë botën, duke u bërë aplikacioni më i shpejtë në histori që arrin këtë nivel përdorimi. Të dhënat janë publikuar nga kompania e inteligjencës së tregut Sensor Tower, sipas raportimit të Reuters.
Në bazë të vlerësimeve, ChatGPT e arriti këtë shifër në muajin maj, vetëm rreth tre vjet pas lançimit të tij. Ky ritëm rritjeje e lë pas shërbime gjigante digjitale si Google Maps, TikTok, Instagram dhe YouTube, duke konfirmuar ndikimin e jashtëzakonshëm që inteligjenca artificiale gjenerative ka pasur në përdorimin global të teknologjisë.
Arritja vjen në një kohë kur konkurrenca mes OpenAI dhe Anthropic po intensifikohet ndjeshëm. Të dyja kompanitë po luftojnë për dominim në tregun në rritje të aplikacioneve të inteligjencës artificiale. Sensor Tower vëren se sjellja e përdoruesve po ndryshon: përdoruesit në SHBA që instaluan aplikacionin Claude gjatë tremujorit të parë të vitit 2026, kaluan rreth 5% më pak kohë në ChatGPT një muaj pas instalimit, krahasuar me përdorimin e tyre mesatar gjatë tetë muajve të mëparshëm.
Në zhvillime paralele, Anthropic ka dorëzuar në mënyrë konfidenciale dokumentet për të kaluar në një kompani publike në SHBA, ndërsa raportohet se edhe OpenAI po përgatitet të bëjë të njëjtin hap në javët në vijim. Kjo tregon se rivaliteti mes dy kompanive po shtrihet tashmë edhe në tregjet financiare.
Megjithëse ChatGPT dominon në numra absolutë, Sensor Tower thekson se Claude kishte rreth 56 milion përdorues aktivë mujorë në tremujorin e dytë, por me një rritje vjetore prej rreth 640%, shumë më e lartë se 62% e ChatGPT.
