Sony po e përfshin gjithnjë e më shumë inteligjencën artificiale brenda ekosistemit të PlayStation, por kompania thotë qartë se AI nuk do të zëvendësojë zhvilluesit dhe aktorët që krijojnë lojërat.
Gjatë prezantimit të rezultateve financiare, Sony shpjegoi se si po përdor AI për të automatizuar procese të lodhshme dhe për të përshpejtuar zhvillimin e lojërave. Fokus kryesor janë detyrat e përsëritura si sigurimi i cilësisë, modelimi 3D, animacioni dhe optimizimi i kodit.
Një nga mjetet më interesante quhet “Mockingbird”, një sistem AI që përdor performance capture për të animuar fytyrat e modeleve 3D pothuajse në kohë reale. Sipas Sony, procese që dikur kërkonin orë të tëra pune tani përfundojnë “në një fraksion sekonde”.
Mjeti është përdorur nga studio si Naughty Dog dhe Santa Monica Studio, ndërsa rezultatet e tij janë parë edhe te Horizon Zero Dawn Remastered. Megjithatë, Sony insistoi se performuesit njerëzorë mbeten në qendër të procesit kreativ dhe AI përdoret vetëm për të optimizuar përpunimin e të dhënave nga motion capture.
Nga ana tjetër, Sony po bashkëpunon edhe me Bandai Namco për të eksploruar përdorimin e AI gjeneruese në prodhimin e videove. Sipas kompanive, teknologjia sjell rritje masive të produktivitetit dhe mundëson krijimin e rezultateve ultra-realiste që më parë ishin të pamundura për shkak të kohës dhe kostove.
Por jo gjithçka është perfekte. Sony pranoi se modelet aktuale të AI kanë ende probleme me konsistencën dhe kontrollin e rezultateve, një dobësi që vazhdon të mbajë njerëzit në krye të procesit krijues.
Ndërkohë, kompania konfirmoi edhe një lajm jo aq pozitiv: shitjet e PlayStation 5 ranë me 46% krahasuar me një vit më parë, pas rritjeve të ndjeshme të çmimeve.
