Falë përdorimit të përditshëm të lavastoviljes, punët e përditshme të shtëpisë janë bërë shumë më të thjeshta, megjithatë ka shumë persona që e përdorin atë në mënyrë të gabuar.
Sipas ekspertëve, një nga keqkuptimet më të zakonshme është se lavastovilja duhet të mbushet sa më shumë që të jetë e mundur për të kursyer kohë dhe energji. Në fakt, kjo mund të ketë efekt të kundërt. Kur enët vendosen shumë ngushtë, uji nuk mund të qarkullojë siç duhet midis tyre, duke bërë që ato të mos pastrohen mirë. Si pasojë, shpesh duhet të përsëritet cikli ose të lahen enët me dorë, gjë që rrit shpenzimet dhe kohën e humbur.
Ekspertët rekomandojnë që të lihet një hapësirë e vogël midis enëve, sa një monedhë e vogël ose gishti i vogël, në mënyrë që uji të arrijë çdo sipërfaqe dhe të sigurojë pastrim optimal. Një tjetër zakon i gabuar është shpëlarja paraprake e enëve para se të futen në lavastovilje. Edhe pse shumë njerëz besojnë se kjo ndihmon, në realitet ajo ul efektivitetin e larjes. Lavastoviljet moderne dhe detergjentët janë të projektuar për të punuar me mbetje ushqimore, duke përdorur enzima që shpërbëjnë yndyrat dhe papastërtitë. Nëse enët shpëlahen paraprakisht, këto enzima nuk kanë mbi çfarë të veprojnë.
Gjithashtu, këshillohet që filxhanët të vendosen në raftin e sipërm, ndërsa gotat, tasat dhe enët më të rënda si tenxheret në pjesën e poshtme. Është e rëndësishme të lihet hapësirë për krahët spërkatës dhe të zgjidhet programi i duhur i larjes sipas nivelit të papastërtisë.
Me disa ndryshime të vogla në mënyrën e përdorimit, mund të përmirësohet ndjeshëm efikasiteti i lavastoviljes, duke kursyer kohë, ujë dhe energji.
